Gott mál var frábært mál!

Ritstjórn
Skilti með áletruninni Tívolí vísar á röð af fólki

Góðgerðardagurinn Gott mál í Hagaskóla fór fram í 13. sinn í gær, 7. maí. Óhætt er að segja að viðburðurinn hafi gengið vonum fram. 

Mikill fjöldi fólks streymdi að og naut þess sem nemendur höfðu upp á að bjóða. Fjölbreytt úrval veitinga, happadrætti, andlistmálning, draugahús, reif, lifandi tónlist, leikir og hársnyrting var á meðal þess sem nemendur höfðu undirbúið síðustu daga og seldu af miklum móð. 

Í salnum var boðið upp á fjölbreytt tónlistaratriði og kaffihús þar sem hægt var að tylla sér niður. 

Lasergeislar lita loftið og nokkrir gestir gæða sér á veitingum.
Boðið var upp á reif-veitingastað þar sem hægt var að gæða sér á vefjum, njóta reiftónlistar og horfa á hressandi lasergeisla sýningu. Mynd: Tryggvi Már

 

Nemendur hafa unnið að undirbúningi dagsins í nokkrar vikur, útvegað allt sem til þarf til þess að láta þetta verða að veruleika og skipuleggja viðburðinn. Óhætt er að segja að fjölbreyttir hæfileikar nemenda fái að njóta sín á svona degi. 

 

Nemandi málar andlit á gesti góðgerðardagsins
Gestur á Góðu máli fær andlitsmálningu. Mynd: Tryggvi Már
Gestur á góðgerðardegi býr sig undir klippingu.
Hægt var að fá klippingu gegn því að styrkja gott málefni. Mynd: Tryggvi Már
Nemandi teiknar mynd af gestum á góðgerðardaginn.
Gestir gátu fengið teiknaða af sér mynd á 10 mínútum. Mynd: Tryggvi Már
Trommuleikari á góðgerðardaginn og gítarleikari í forgrunni
Á sviðinu í salnum stigu fjölmargir nemendur á stokk og léku tónlist fyrir gesti og gangandi. Mynd: Tryggvi Már

Ágóðinn af söfnun dagsins mun svo renna til stúlkna í Afganistan og Kvennaathvarfsins og verður söfnunarféð afhent á næstu vikum. 

Við þökkum öllum sem lögðu leið sína í skólann á þessum skemmtilega degi!